Gjatë ditës së sotme, Inspektorati Policor i Kosovës përkatësisht Departamenti i Hetimeve përmes Linjës së Kaltër, ka pranuar një informacion nga Policia e Kosovës, pas dyshimeve se një toger policor ka kryer veprën penale “Fotografimi dhe incizimet tjera të paautorizuara”.

Pas pranimit të informacionit hetuesit e IPK-së kanë dalë në vendin e ngjarjes ku dyshohet se është kryer vepra penale respektivisht në zyrat e Sindikatës së Policisë së Kosovës.

“Zyrtarët e IPK-së  kanë kontaktuar me Prokurorin kompetent duke ndërmarrë veprime konkrete hetimore së bashku edhe me njësi relevante të Policisë së Kosovës”, thuhet në njoftimin për media.

Tutje, IPK bën të ditur se në kuadër të veprimeve hetimore është bërë ekzaminimi i vendit të ngjarjes si dhe është konfiskuar një telefon mobil i cili pritet të dërgohet për ekzaminim të mëtutjeshëm forenzik.

“IPK pas veprimeve fillestare hetimore ka rekomanduar suspendimin e zyrtarit të dyshuar”, thuhet në njoftim.

Inspektorati Policor i Kosovës deklaron mbetet i përkushtuar në përmbushje të misionit ligjor në konsultim të vazhdueshëm edhe me prokurorin përgjegjës për zbardhjen e plotë të rrethanave të këtij rasti./Arbresh.info/